مقتطفات ...

( 1 ) 

يا رب صعبناللي كل شي بحياتي

ودي أمر ب طيب عشرين مره

لا صار هذا الدرب ، دربن ل ذاتي،

أخيّر  ل قلبي من عيوبٍ تضره

( الحمدلله على كل حال ) .. 

( 2 )

 تعبت من هذا العنا علّمني كيف اجتاح

الواقع المجهد على صدر الدجى الغافي

علمّني ليه أسرد ل همي والدمع لا طاح

علمّني كيف انسى الزمان الموجع الوافي

أوفى من الأحباب لا قالوا الليالي شحاح

وأطيب من الأحلام لا غارت على شغافي

قالوا إنجذاب أرواح وقلنا : إنجذاب أرواح

والخالق الرحمن ،،، يعلم في الحشا خافي 

هجيرك

وش علومك ؟؟؟؟

وش علومك حي طيفٍ طاري الخفاق جابه

ما قريت ألا شواهيق التفاصيل الرهافي

وين عادي ، نورك اللي لو لمحته من إجابه

صرت كلك في خفايا الروح مثل النور ضافي

بس تدري ، قبل ما أنكف بالهزايم ف الكتابة

أجذب البارض وأهيّد للكتابة في شغافي

من يخاويها حمية ،، ولا يخاويها غرابه ؟

بحت للخاطر ، ونا اللي أستّظلك قبل قافي

شي من باقيك ،، ليته شد برحال الرتابه

في رواق الدار كله ،، والعنا قطعة لحافي

جيت ل مداد الدواة اللي تعدت به سحابه

الظمأ جرة كسير ٍ ،، والفضا شرهة سنافي

والخيال اللي سبرته ، لا هو نو ٍ من سرابه

الهجوس تهب وأثره كل جرحٍ فيها غافي

اتلقّف ليل حادي وأحسب النيه ركابه

النوى جلبابه اللي يسحب أنفاس المجافي

آه يا حر المدامع ، دمعة المسرى ،، زهابه

يومها حتى النسايم ، في مداينها عجافي

يا عساها الريح تذري بالذواري في غيابه

ساقت حلومي وصارت وسط كفّين الفيافي

بس قلت : الصبر ينذر للتباريح ، الصبابه

ما نذرت ألا الحنايا، توهب الخافي ، ل خافي

حي طيفٍ لاح من نوض المشاعر ، لا تشابه

كل نوضٍ ، غير طيفك ، له اذا لاح اختلافي

وش لقيت إلا المظامي ، شوقها أكثر رحابه

يا سقى الله الرحيب من الوصل لا صرت وافي 

شعر .. هجير 

أرض الشتات ...

بقايا الهاجس اللي دار بي يا سيدي مفتوت

على أرض الشتات الغابرة لين المست قاعي

وانا وش لي ب "أنا" في عز هذا الواقع المنعوت

بأن الواقع اللي جيت له ،،، مرٍ من أوجاعي

وش اللي يترك الأحلام تتنفس بليا صوت

وش اللي يجعل الأنفاس تتهاوى على ذراعي

ياهي لحظة وهن، ما كانت إلا وهن مثل القوت

يا كيف أمد لك كفي الهزيل بوسط مرباعي

تعبت أحسب ثواقب عتمةٍ ،، صّحت حنايا بيوت

تخايل برقها ان لاح ، قبل يهب ذعذاعي

تعبت و يا كثر كلمة "تعبت" بداخلي ممقوت

كثر مقت الليالي ، هذرةٍ ما هزت أسماعي

أرد بصوت ، وادري كل نبرة فات فيها الفوت

عن الغيبات ، ورجوعي، و نية تسكن أضلاعي

سلام الله على ليلٍ هجع في خافقي ب قنوت

كريمٍ في السهاد المنسرب والناس هجّاعي

على قولة خفوقي:" ما عرفتك يا رهين سكوت"

سكوتك مثل قيعان الجدب ، ما مرّها  راعي

ألا وين السنين الطيبة ، من قبل ماهي تموت

ألا وش ه المظامي لا ندهت الروح يا شعاعي

أنا يمكن عجزت استوحشك يوم الصدى مكبوت

ما عادت لحظة الفرقا تشد أطناب ملتاعي

كثير أنكف على هزومي ولو فيها الهزايم موت

أروح وهاجسي غاير ، وأوضاعي هي أوضاعي

تولّم للسفر في خاطرٍ ، ما به عذل و شموت

أشرّد  في حشاي أسراب ، مرتّني بلا داعي

أخاف إنك على فتات الهجوس تمّرها مبهوت

وطْيت  أرض الشتات ولا بقى لأهل الوصل ساعي

هجير

أنا مدري ...

تعبت اقول يا الخفّاق : انا مدري

تعبت اقول انا قلبي عطيب شوي

تعبت اقول أجّر الصوت من بدري

يا وين الضي بالفرقا ياوين الضي

تعبت اقول كيف ان الحكي يبري

تعبت ارد من نفس الحكي بلا شي

انا يمكن سبرت أغوارك ف صدري

أظن الشوق  بمسرى المحاني حي

اسولف لي عن اللي ما بدا يسري

شبيه العشق وانفاس الظما والغي

غدا  لي الليل خدرٍ ،، والفجر خدري

غدا لي الصمت في ٍ والسوالف في

على كثر التعب ،، ما جيت يا عمري

أزيد مواجعي ، وأقول قلبك عي

"هجيرك "...

دمعة ٍ ما طاحت ..

الحياة هي حياة لكل شئ حي ،،

الاماني وما أدراك ما الاماني ؟؟

كل ما نسعى إليه ، 

مساحة كبيرة للبوح بصدق ،،

ومساحة آمنة للعيش بسلام ..

ناسن يوديها الكلام الغث ومرة ايجيبها

ناسن على قولة بعيد أخيّر لها لو راحت

ناسٍ يعيث بها الحسد حسودها ذا عيبها

يا كثر ما تدفن نفوس أشيا بها ما باحت

يمر بي وقتي وانا اطباعي على ترتيبها

صدق ٍ  يجنبني مخافة زلةٍ  ،، لو  لاحت

وكذبٍ اذا مر النفس صعبٍ تجاوز ريبها

أخير لنا صون الضمير ودمعةٍ ما طاحت

"هجيرك"...

بعثرة ...

للشعر عامين مرن والورق كان اخضراري

فاح من جوف الدفاتر وانتشى بك أعطره

قبل هالعامين وأطراف الورق تظما الطواري

لو ندهت اسم القصيدة ، جاتني في بعثره

الزمان اللي يصحى أنفاسها ، صحى الذواري

والوله هيجا السطور ، تثيرها في محبرة

وش يباري الريح ، لا صارت مداينها قفاري

والحروف احطامها اللي في الحنايا تنثره

قلت في نفسي ونا استنهضه باقي اصطباري

أي صبح ٍ يندثر في الليل ،، صعب أتذكره ؟

وأي ليل ٍ ما يهز الصبح ، لا طال انكساري ؟

يمكن اني التمس القلب عذرك ،، واعذره

للشعر عامين مرن ،، بين ظلٍ وانهماري

كل ما في الأمر ، جيتك من مضامي الثرثرة

الغلا فيك استظله ، وما على الخافق مواري

لو لمحتك ظل ، شفت الأرض صالت بختره

ما سهرتك قرب ، لكن كل جفنٍ فيك ساري

وما سريتك صمت ، لكن الحكي فيك اسهره

تجنح ل طرفي شموسك ، هيه يا أقصى نهاري

ظلليني ظلليني ،،، راح بي الهجس ، اكثره

جيت من صدر القوافي لين صار الشطر داري

وأنكف ل عجزه ،، وكني من يعود ل مهجره 

"هجيرك"....

كالأشلاء ،، بين كلمة وأخرى ..

كالأشلاء التي تنثر  ما تبقّى من أطيافها ،، في أروقة القصائد ،،
بين كلمة وأخرى،، تتهاوى أنفاس في كمدٍ ،
وتتنهد أنفاس ب لحظة سكون ..
قلتُ ل هذه الاشلاء :
انتِ من طيف غائب ،،
رمى كل غيابه على متن الخذلان ومضى ..
وقبل أن أتحدثُ إليك أيتها الاشلاء ،،
كنتُ أحادثُ طيفه الغائب قائلة :
لم تكن ْ يا سيدي سوى بضع كلمات أثقلها كاهل
الوقت ب اللا معنى من الصدق ..
أنت يا سيدي لا تتصور بأن الصدق سر الحياة التي
ستعشق أسرارها من خلاله ..
هكذا كنتَ أنت َ ،،
وهكذا كنتُ أنا ..

كنت أنا شيٍ من المعنى على صدقٍ وطيبه
ما تجّرد غاية اللحظة إذا قالوا الصدوقي

الله اكبر يا العنا  يومن كبر في كل خيبة
وين بلقى في تفاصيل الكذب شيٍ يفوقي

كل غاية ،، مير يا سيدي بدا حرفي ابمشيبه
كثر ما شابت على طرف الوله لحظات شوقي

السجايا الطيّبة في عين كل الناس هيبه ،،
وما يفاخر بالشموس الا الذي مد الشروقي

في ذراه اللي يفاخر به ، ولا شي ٍ يعيبه
لا عطا الكلمة ، سعى فيها على رقة وذوقي

ما ترك ل الليل هاجس من هواجيسه تجيبه
مثلما ساقت رياح السالفة ، فيها وتسوقي

كل عاتي من صواديف الوهن ، يا عزّتي به
ذاك من يرقا مراقي المرجله ويرقى خفوقي

ذاك من لاحت على يمناه ، كل أرض ٍ رحيبه
سولفت لجله عن طويل الذرى ، لمعة بروقي

"هجيرك" ..

الذاري ......

ودّي أقول اني شعلت ظماي داخل صدري

عجزت أدوّر لي سراب الما لا هب الذاري

واشوف جوف المحبرة ريحٍ صفيره يسري

لا الأرض أرض الواقع المنسي ولا أفكاري

خَبَتْ على جذوة تباريحي , لهايب جمري
الصمت من حولي ومن دوني يشّد أوطاري

يا الشوق يا انت الوله كله يا ذنبي وعذري

يا البرد يا ظلالي يا همّال الحشا المدراري

كن الحنايا اللي إستدلت بك هنا من بدري

ما بين ضلعاني وهذا النجم فيها الساري

فيها ضجيج الغيم وممطور الحيا والقمري

وانك تخبّي لـ عتمة أسفارك ضيا أنواري

تعبت أناديني من هجوسي وأناقض أمري

و أرد من أمر العنا يومن تطول أسفاري

لكن أشوف الجدب في قلبك خيوله تجري

ورهان خفاقي على جدبه عجاج مهاري

ياأكثر الوحشة وهي مثل الونيس لـ صبري

ويا أكثر الألفة وهي مثل النفور لـ طاري

ما عاد هذا الليل يجتاح الأنا و الـ "مدري"

جيتك حطام أغوار , خليّني ألّج أغواري

"هجيرك"

صَداك الغّضْ

يا الصْباح اللي لمسْ وجْنة عنَاي وعيني

يا الصْباح اللي يقول أُنثى الشِتا , مجنُونة

مثل صوتٍ حايرٍ فيني , ولا هوب فيني

ما قويَت اصداي في صَدرْ الوَله وشجُونه

يَرْتحلْ عني صَداك الغّضْ ثم ايجيني ؟!

الكلام اللي سَردْ بعضي , و جّْر لحُونه

ليه نَازلته على صمتٍ , بدا يَسْرِيني

يوم بَاغتني الدجى ,, كنّي غرِيق ٍ دُونه

يا صَباح الوَرْدْ ما شفت الوَردْ يا عيني

ذا الوَردْ كلمة تودّيني ,, لـ بَارق لُونه

وش يخلّي الوجدْ متنَاَهي غزَلْ و يليني

وش يخلّي اللِين متنَاهي لـ وَجدْ طعونه

صرتْ أحبّكْ والظنُونْ انته وأنا تخميني

إيه أنا التخمين , لو يِرقا لـ هامْ ظنُونه

صرتْ أحبْ الشُوقْ وشغَافك تمَرْ سنيني

وإن ندَهني الشُوق لبـّيته ,, هَلا يا عُونه

"هـَجِيرك"

الإنتظار كقطعة ثلج

سلامٌ عليك أيها المكان الذي يحتويني الآن 

سلامٌ عليك كثيرا ولكني أرتأيت أن أخبرك :

قلبي مجهدٌ جدا !!

صوتي مجهدٌ جدا !!

وحدتي مجهدةٌ جدا !!

كي أجعل هذا المساء يستفيق من الإجهاد شيئا فشيئا ؟؟!

الإنتظار كقطعة ثلج لم تحتملها أناملي كلما ضممتها في كفي الهزيل ..

المساء لا أغوار له سواك أيها المكان ,,

لا أغوار سوى جدراني ,, تلفازي الذي يعرفني كلم لمسته وتنقلت بين قنوات أحبها ..

لا أغوار له سوى زوايا الغرف المجاورة ل غرفتي , وملامحي التي تجوب مساحتي الضئيلة بلا حذر من الحزن ..

أسررتُ إلى قلبي: إشتقتُ إليه كثيرا بحجم الشوق حين يصبح بحجم السماء ..

والصمت سياج يحيط بالمكان ..

فليمد لي يديه حبيبي لكي يخرجني من السياج 

فالصمت سياج والشوق سماء .. 

يا المسا الغاير ف صوتي ردّني له

ما عرفت أشتاق خارج صوت خلي

جيت أنا و أختال كلي في صهيله

من صهيله ,, يا كثر ما أختال كلي

هجير 

خيالي أنت ..

الخيال واقفا على عتبة بابٍ مقشّعر بالحلم ،،

أتراه هو ؟

هذا الذي يختال في أوردة الكلمات كل يوم ؟

مددتُ من الأشواق عمرٌ آخر لها يتنفس الورق المنسي

وعدتُ إلى قلبي لاهثةٌ لا أدري أيُ حلم سيقودني إليه ؟

 قال لي : مشتاقٌ إليك ..

وفي رأسي تنزوي كل علامات التعجب الثرثارة ،،

قالها هكذا دون ترّوي ،، دون تأنّي ،، دون إنتظار بردة فعل ٍ جديدة

سيشعر به قلبه من كلماته هو ذاته ..

جنون لا يعترف به ،،

قد ينحسر حين أغيب عنه بنفس قوة إقترابه مني ..

قال لي :أريدُ ان ارى كلماتك ..

هو لا يريد أن يراها فقط ،،

الأبجدية مراوغة جدا حين تكترث بالمعنى ، وتأسر القلوب

ولكني تمنيت ان يراها ،، فلربما وضع يديه على الخيال

ولربما رأى أنفاسه تستوطن الخيال

ولربما ولربما ،،،،،،،

سررتُ إلى نفسي :

كم من الاسراب تلك التي يألفها ؟

ولكني قلتُ له حينها :

أسراب طيورك يا سيدي ،، كأسراب حلم ،، أو سطر ثَمِل ،

فلا تجعلني أحلق خارج الاسراب المنتشية بك حتى الثمالة ..

الحياة قاسية ،،

ووجع الشوق قاسي ،،

ألديك فكرة عن صفة الشوق والوله واللهفة والشغف والتوجد ؟؟

وأحسبه لا يدرك عمقا ،،

مثلما نقرأها او نسمعها ..

مساؤك عاطر ٌ يا سيدي ..

مساؤك أنا ...

أتكفي اللحظة العابرة ان تكتفي ب أنا ،، وانت بعيدٌ عني

قلبي يرنو إلى ظلالك الوارفة المتشابكة الكثيفة ..

ك إخضرار العشق في أوراقي ،، وفي مسافات

ك الندى المخضّل في الأنفاس الثائرة على الصمت ..

يمكن على طاري الوله ،، أنسى انا غيابك

يمكن اذا قلت الغياب ،، تحس باللحظات

ان الوله شي ٍ من الذكرى ، ومن اسبابك

شي ٍ اذا لاحت رياح الشوق، ماهي شتات

وانا لقيت العشق شي ٍ ،، لو لمس بابك

اكثر من الذاري ،، اذا يترك بقايا أصوات 

وأكثر من شعورن تحدّر سيل ب شعابك

هذي شعاب الوجد في صدري هنا بالذات

لا ليل يعبرها سكون ،، ف لحظة اعتابك

ولا ظني ابصدري نهارٍ  ،، خاوي الكلمات

فداك قلبٍ ما قوى غيابك ،، ونا غيابك

قل لي : أحبك كثر ما جفني  سهيرٍ بات 

ه ج ي ر ك 

كل هذا العشق وأكثر ...

حين أقترب المساء ,,

كان النهار يسحب جلابيب الشعاع  ..

مساء يقترب مني ,, مثلما يقترب منك أنت 

هذا الغياب الذي ينأى بقلبي ,,

كيف سيربط بيني وبينك ؟

أستجمعُ حكمة الصمت الواهنة ,

فاالليالي 

كيف سيجعل من نبتة الصباح تختال على حقل الكلمات

حين تشتاق الكلمات إلينا ؟

ما أسم هذا الصمت ؟

ما أسم هذا الوجوم ؟

ما أسمي أنا ؟

أنا ,, لا أدري كيف بنيت على أنقاض العشق معتقل للأبجدية العطشى ؟

ولم أظفر ب صدى عابر يشبه أصداؤك ؟

يغمر وجهي الشوق وكل علامات الغياب 

سأغير ملامح حزني عليك 

وسألوذ بـ جرح يترنح في ثمالات العبارات ..

أحبك 

أحبك كما لو تعلو الغيوم بأنفاسها , ثم يزهو المطر على الثرى حين ينهمر ..

أحبك كما لو قلت أحبك فـ أستدرجُ ظل القلم إلى أرض الورق

أهو العشق حين يستضئ الكلام بك ؟

أنت يا سيدي كل هذا العشق وأكثر ...

هـ ج ي ر ك 

دخيل هذي الحنايا ...

دخيل هذي الحنايا اللي تندهك "وينك"

تعبت أرّد لـ عنا حالي ,, يا عنا حالي

تعبت أناديني من صمتي وهذي سنينك

ماهي على خبر خفاّقي ,, وحر غربالي

محيت لي سطر واثره من غاير اظنينك

يشيل من طاري الذكرى ,, ربكة آمالي

وأقول يا ليت بس همي ,, تكتبه ايدينك

بنيت بالسطر هامات ٍ ,, مثلها جبالي

لا جيت أدوّر عن خصالك شينك وزينك

ما أشوف غير الخصال اللي تعتلي عالي

الود هو يا الغلا ظلك ,, و هو بساتينك

يخضّر به خافق ٍ غالي ,, وانته به غالي

وان قلت لك كنت بغيابك , ظلة رهينك

من يوم ذا البعد  قيّدني , ويشبه أغلالي

يا كيف يفرق به المعنى , من مضامينك

أرخصت قلبي وانا مدري وش هو التالي

ما عاد لي في تلاحينك ,, كل تلاحينك

وان كانت الضحكة الغرّا تشبه خصالي

 يمر في هاجسي أسأل عن نظر عينك

سؤال ,, يتثاقل ومدري ,, يا بعد حالي

 " هـجير "

2 / 8/ 2015

إحتواء ...

لم يعد الشوق , إحتواء العبارات التي ينبجس منها وهن البعد والغياب ,و
لم يعد الشوق نظرة عابرة مجنونة ,,
لم يعد الشوق صفة مقروءة قد تصاغ كمفردة بلا روح ,,
الشوق يا سيدي ,, إحتواء الأرواح لأ يكتمل بها كل مسميات العشق حين نشتاق ..
واكثر من ذلك حين أقول : " إشتقت إليك "
وحين تقول : " إشتقت إليك ِ"
أتدركُ حقا ,, مسمياته الأخرى حين تختلج كلها في صددورنا ؟
كـ الوجد ,, والصبابة , والوله , والتوله ؟
تلك أنا ,, وتلك روحي .. فـ عِش تلك الروح كما هي ,,
فلا تصلح بيننا الأنا الغائبة دونك ..

#أقول :

تنشدني عن قلبي ؟ بي الشوق جارف

سيل الحنايا اللي بها روض الأشواق

 

ينهال من عقب العنا , وانت عارف

وشلون حال اللي من البعد قد ذاق

اشتاق لك قل لي : بك الود وارف ؟

أورف من الدوح الخضر وسط الأوراق؟

لك من دموع امفارقك , ظل غارف

جفن ٍتبلل في دجى الليل , ما فاق

إلا على غيابك ,, سهاد المطارف

أقسى من شعور الجفا , حزة فراق

جعل المحاني العوج,وسيل الذوارف

تضماك لين أسقي المضامي ف خفّاق

 

صارت شغاف القلب , أرض ومشارف

وأكبر من حدود الفضا, دونكم ضاق

 

" هجيرك " ..

 

أسابق الهاجس ...

شوقي  وأدري به أذا ثار بي الشوق

لا عاد تنشدني عن اللي ارتمى فيه

من سالف أيامن بها عطر وعبوق

لا جرت الذكرى وغنى له التيه

تشتاق لك عيني وحب ف العروق

يسري بخفاقي وكنه مجاريه

وش عاد لو ليل المحاني له عذوق

والقلب له قفرن وذا الود يرويه

وجدي على صمت ٍ ونا اتذوّقه ذوق

مما تذوقته , فلا القلب يطريه

أسوق خفاقي على الوجد لك سوق

وأتل دمعاتي المحاجر وأغطيه

مثل الخلوج اللي لها نايح النوق

أسابق الهاجس أجيبه و أوّديه

مابين ضلعاني ولا جات برفوق

برفوق يا عوج المحاني من ال "ليه" 

ما قلت لك ليه المدامع بها فروق

وليه الحنين يرد صمتي ولا أرجيه

وليه الغياب أثقل من المزن وبروق

أخالها بأرضي وهي من ذواريه

أجيك ل شغاف الدياجير ملهوق

هذا عناي اللي على الهاجس يجيه

الطاري اللي خذ من أنفاسي ل توق

تعبت أعد الليل ضمن المشاريه

ممساك يا طرف ٍ له سهاد وحقوق

حق ٍ علي أشره على السهد يا هيه

أرخيت لك جفن ٍ على الود ويفوق

لا فاق في منزال غيم ٍ ,, يباريه

هيـّـد بموق العين لا جاد لك موق 

مما خفاه الشوق بانت مواريه 

شعر : هجير